日本宫城县呢个星期有单盗窃案特别受网友注目，公安从一名34岁男子屋企搜出赃物，竟然全部都係《麵包超人》相关玩具，其中又以积木最多，究竟点解好偷唔偷，专拣《麵包超人》嚟偷?
呢单《麵包超人》玩具大盗立即成为讨论区热门话题，好多网友第一时间估呢个小偷係咪有恋童癖，定纯粹係《麵包超人》忠粉，点知两样都错，原因只係想圣诞搵快钱!临近送礼季节，贼人表示呢个时期偷玩具转卖畀家长特别易，如果几十件玩具都卖得出，都可以大赚一笔咁话!
家长谂送咩畀小朋友就话易，但对热恋中情侣嚟讲就係一大难题，好彩日本格价网站《価格.com》已经帮大家按预算同埋对象类型，列出十大受欢迎嘅礼物清单，根据今年个圣诞礼物特集，令男友同埋老公最开心嘅礼物，第1位係银包，多间格实用款最perfect；其次係颈巾，网站提醒女生要按对方身高体型来选择颈巾长度，质地要柔软顺滑，质量好嘅一条够用成世!第3就係冷衫，传统英式花纹最得体!第4至第10位顺序係手套、钢表、公事用皮袋、羊毛大衣、鬚刨、巧克力同埋绅士皮鞋。
咁女朋友同老婆又钟意收到咩礼物呢?最想收到係颈链，网站冇话一定要钻石嘅，但最好要设计简约、素材高质，男士们识做啦。第2位係手袋，质料以皮革最受女人欢迎，款式偏好crossbody，clutch呢类细袋；第3係戒指，网站话收到戒指会令女生有浪漫同幸福感觉，都冇话要钻石嘅，男士自己衡量喇。第4至第10位顺序係花、银包、耳环、腕表、皮带、手套同埋美容仪器。
图片来源：https://youtu.be/Pbla4V8za3k
