对于同性恋呢个议题，一直都係大众热门讨论嘅焦点，日前日本资生堂于万圣节发布彩妆微电影广告《The Party Bus 好きだなんて 言えない》(派对巴士 欲言又止…好喜欢你），就以LGBT(同性恋、双性恋或跨性别族群)为题材成功引起话题，加上唯美色调及瑰丽画面，荣获「EPICA AWARDS」国际优秀广告奖金奖。
故事围绕3位主角，女主角「辉夜姬」、恋人「德古拉公爵」及神秘「蒙面武士」。万圣节当晚辉夜姬、德古拉公爵同众好朋友出席于巴士上举行嘅cosplay party，不过辉夜姬成晚心不在焉，明明情人就喺身边，心入面就谂住第二个。原来佢最近发觉自己最好嘅朋友对自己似乎超越咗友谊，但两人都怕会影响大家关係而唔敢再进一步。
当德古拉公爵怖到浓时想锡辉夜姬，佢不自觉地留眼泪，面上妆容亦发生奇妙变化!嘴唇上嘅红色唇膏好似施咗魔法咁，化作一位红色女孩，手舞足蹈，彩色眼影亦加入一齐轻快跳舞，象征辉夜姬内心最渴望嘅勇气及自由!
辉夜姬睁开双眼，避开德古拉公爵一吻，然后冲落巴士，追上刚离开嘅「蒙面武士」，武士除低面具，原来佢就係辉夜姬最好嘅朋友，辉夜姬眼神坚定，两人情深一吻。影片最后写住「Make up your own story」，表达女生因为彩妆而获得勇气，勇敢追求真爱!
Love has no gender!广告以LGBTQ(对其性别认同感到疑惑嘅人)话题作为结局，为观众带来小惊喜，而且令人深思。当然，广告另一加分位，就係出现咗只有短短分零钟嘅「定格动画」，原来耗时几十小时拍摄，唯美色彩、华丽画面，令人眼前一亮。
图片来源: 资生堂
