作为男人，相信其中一样最惊嘅係等女伴；未结婚前就要等佢出现赴约，结咗婚之后就要等佢换衫出门口。而且好多时唔係男人等到烦，连女人自己都觉得拣衫好麻烦，尤其係钟意买衫嘅女人，愈多衫去拣只会需要愈多时间去拣。日前英国就有一项有趣研究，发现女人由18岁至65岁呢段最贪靓嘅时段，用喺拣衫嘅时间就足足高达5个月！
研究搵嚟2,000多位女性作调查，平均咁去计出每位女性于唔同场合要用几多时间去拣衫，其中每朝返工就要用12分钟、假日出门就要10分钟；至于同伴侣外出就高达28分钟！研究又另外指出，有54%女人会喺前一晚已经谂第二朝会着咩衫，但虽然谂定，但超过3分2嘅女性会一而再、再而三咁着衫、除衫，然后陷入迷茫之中。也有15%女性试过就算最后拣好咗，着好晒衫出门口，但会因为后悔而返屋企换衫！拣衫对于女性真係一种好高深嘅学问同技能，一旦掌握到，就可以脱离拣衫地狱，每日可以悭返唔少时间，一生人仲可以多咗5个月日子呢！
