拍咗好耐终于都播嘅《十二传说》近排都几有口碑，可能因为大家都好耐冇睇过TVB有灵异片，当然萧正楠同林夏薇係大家睇嘅重点，但近几集有一个颇熟悉的脸孔出现，戏份唔多，但喺TVB剧集和网络都係老是常出现，佢就係饰演林夏薇前男友嘅黄建东，而大家可能唔讲唔知，黄建东曾经係130磅，有8嚿腹肌小鲜肉。
入TVB 8年 肥咗70磅
现年37岁嘅黄建东，2011年参加香港先生选举而加入娱乐圈，并签约TVB成为合约男艺员。当年30岁嘅黄建东绝对㗳得杯落，近6尺高，但只得130几磅，仲要有八嚿腹肌，堪称「小鲜肉」！
虽然当年香港先生选择冇攞冠军，但就得到「演艺潜能大奖」，仲喺陈奂仁手中接过大奖㗎！
不过入行呢8年间，黄建东就肥咗近70磅，由本来嘅八嚿腹肌小鲜肉，变咗做一团猪肉，不过唔行靓仔小生路线嘅佢，反而令佢杀出一条血路，靠网络恶搞片传红网上世界，继而仲有机会一嚐男主角滋味，担演TVB网剧《降魔的番外篇—首部曲》的男主角古尼一角。
▲黄建东其实私下係个斯斯文文嘅靓仔。
▲黄建东嘅「代表作」应该就係《PPAP》。
▲同埋近期嘅《What time is it?》
黄建东虽然俾人定型为行搞笑路线，但其实佢一直都想演认真嘅角色，甚至奸角都想挑战，奈何佢深明喺网上世界就係要搞笑先引得人注意。不过，正因为靠着搞笑成功出位，人地就只记得佢嘅搞笑，好少人会搵佢做搞笑以外嘅角色，所以佢话有时都几无奈。
美国大学高材生 演大台小角色
大家咪以为黄建东一直行搞笑路线，大台演出机会唔多就係佢背景冇乜料到，其实佢係喇沙毕业，又係美国纽约州立大学佛东尼亚分校，以高级荣誉毕业嘅戏剧系学士毕业生，仲曾经係美国工会演员，仲签过美国经理人！
在美国工作时仲与《色慾都市》嘅女主角 Sarah Jessica(杰西卡服饰) Parker合照，掹车边都叫「荷里活演员」。
不过，点解要回流香港？黄建东：「始终係有色人种，喺美国嘅亚洲人角色实在太少了，加上喺美国生活经常受到种族歧视，加上语言障碍，要融入美国人社会，要花好几年嘅时间，始终心态係格格不入，上堂时经常因为口音而被其他同学取笑。」
好多人以为签到TVB就会一帆风顺，但喺大台呢8年间，黄建东一直被安排「大茄」角色，例如《食为奴》九皇子、《忠奸人》郭晋安衰细佬、《降魔的》恋袜癖乘客、《枭雄》黄秋生门……大部分角色可能连名都冇个，更唔好话俾人有深刻印象。
演《十二传说》林夏薇前男友超感恩
明明係美国大学戏剧系高材生，但做咁多年都係做紧「大茄」，虽然而家做《十二传说》林夏薇嘅前男友，好似讲出嚟都几好听，但都只係第二个单元故事嘅其中一角，过几集又会死，戏份甚少。
不过黄建东超级乐天：「我呢啲咁嘅身材，又唔係靓仔，竟然可以做到林夏薇前男友，好感恩啦！」
佢拍《十二传说》呢套灵异剧嘅时候，都有遇过怪事：「有场戏係讲我要㩒个女仔个头落水，嗰阵我喺水面见到有个女人块面嘅倒影，但明明我㩒嗰个女仔个头係头顶嚟，冇可能会有块面啲度。我嗰阵即刻话：『我地拍戏㗎咋，好快走㗎喇！』咁就好似冇事喇…」
黄建东好明白娱乐圈嘅运作，明白自己点解会不被重用：「要怪就怪自己入行时已经30岁，有一个先决条件同人争，如果俾着我係公司监制、老板、投资者，我都会投资喺年青小鲜肉身上，好似而家公司嗰班『后生仔』咁。」不过黄建东都唔介意，因为：「演员就係无论你係咩出身，就算係香港先生、星二代、富二代都好，大家都係等紧一个时机，唔会一出就会被观众接受，都要有作品先会令人深刻，我觉得自己就係等紧呢个时机。」
所以黄建东话佢从来都唔介意做「大茄」：「而家去到街上有人认得我，上网又search到我少少作品，我已经觉得好开心。」诚然，呢位演员确实相当努力，就算冇剧拍，佢都会自己谂桥做创作，拍片希望得到多啲观众赏识。「我相信公司嘅监制、导演们都需要时间去理解黄建东可以做到咩角色，所以我对于自己每个角色都係期待。」
